اہم ٹریفک ایڈوائزری، بدھ کی شام سے بندش، متبادل راستے اختیار کرنے کی ہدایت۔
موٹروے ایم ون اور ایم چودہ سمیت اہم شاہراہوں کی بندش کا ٹریفک ایڈوائزری کارڈ
وفاقی دارالحکومت اور خیبر پختونخوا کے مختلف حصوں کو ملانے والی اہم شاہراہیں اور موٹروویز ٹریفک کے لیے مکمل طور پر بند کر دی گئی ہیں۔ موٹروے پولیس اور متعلقہ ٹریفک حکام کی جانب سے جاری کردہ ہدایات کے مطابق 23 ستمبر 2026 کی شام سے اہم شاہراہیں اور ان کے انٹرچینجز ہر قسم کی ٹریفک کے لیے دونوں اطراف سے بند رہیں گے۔
دستاویز کے مطابق موٹروے M-1 اسلام آباد سے چچھ تک دونوں طرف سے بند کی گئی ہے جبکہ اس کے تمام اہم انٹرچینجز بشمول اسلام آباد ٹول پلازہ، فتح جنگ اور ترنول انٹرچینج، سنگجانی اور اے ڈبلیو ٹی انٹرچینج، برہما باہتر انٹرچینج، برہان انٹرچینج، ہزارہ موٹروے انٹرچینج، غازی انٹرچینج اور چچھ انٹرچینج کو بھی بند کر دیا گیا ہے۔
اسی طرح موٹروے M-14 ہکلہ سے کندل تک دونوں اطراف سے بند رہے گی۔ ذرائع کے مطابق اس روٹ کے ہکلہ انٹرچینج، فتح جنگ انٹرچینج، پنڈی گھیب انٹرچینج، خرپا انٹرچینج، تارڑ انٹرچینج، داؤد خیل انٹرچینج، کوٹ بیلیاں انٹرچینج، عیسیٰ خیل انٹرچینج اور کندل انٹرچینج پر بھی ٹریفک معطل رہے گی۔ علاوہ ازیں، اٹک خورد کے مقام پر جی ٹی روڈ N-5 کو بھی ہر قسم کی ٹریفک کے لیے بند کر دیا گیا ہے۔
دوسری جانب لاہور سے اسلام آباد جانے والی M-2 موٹروے تاحال تمام قسم کی ٹریفک کے لیے کھلی ہے۔ حکام نے مسافروں اور عام شہریوں کو ہدایت کی ہے کہ وہ خیبر پختونخوا کی جانب غیر ضروری سفر سے گریز کریں اور سفر پر روانہ ہونے سے قبل متبادل راستوں کا انتخاب کریں۔ کسی بھی ہنگامی صورتحال یا تازہ ترین معلومات کے لیے مسافر موٹروے پولیس کی ہیلپ لائن 130 پر رابطہ کر سکتے ہیں۔
