اقلیتیں غیر محفوظ، رات کی تاریکی میں انہدامی کارروائی، ہزاروں عبادت گاہیں نشانہ بن چکی ہیں، رپورٹ جاری۔
بھارت میں مدینہ مسجد کی شہادت کے بعد کا ایک منظر۔
ترک نشریاتی ادارے ٹی آر ٹی کی رپورٹ کے مطابق بھارت میں بی جے پی کا ہندوتوا ایجنڈا شدت اختیار کر گیا ہے اور ملک بھر میں اسلام دشمنی سر چڑھ کر بولنے لگی ہے۔ بھارتی حکام نے نئی دہلی کے علاقے شالیمار باغ میں قائم مدینہ مسجد کو رات کی تاریکی میں شہید کر دیا۔ مقامی رہائشیوں نے مسجد کے اندر افراد کی موجودگی کے باوجود اس یکطرفہ اور غیر قانونی انہدامی کارروائی پر شدید غم و غصے اور تحفظات کا اظہار کیا ہے۔
دوسری جانب امریکی نشریاتی ادارے مسلم نیٹ ورک ٹی وی کی تحقیقاتی رپورٹ کے مطابق بھارت میں جاری 6 سالہ بلڈوزر مہم کے دوران اب تک 2,100 سے زائد مسلم عبادت گاہوں اور عمارتوں کو نشانہ بنایا جا چکا ہے۔ رپورٹ میں مزید انکشاف کیا گیا ہے کہ 2020ء کے دہلی فسادات کے دوران بھی کم از کم 17 مساجد، مدارس اور مزارات کو منظم حملوں کے بعد نذرِ آتش کیا گیا تھا، جو بھارتیہ جنتا پارٹی کے دور حکومت میں اقلیتوں اور بالخصوص مسلمانوں کے مذہبی مقامات کی عدم تحفظ کی بدترین عکاسی کرتا ہے۔
