نئی دہلی/گھریلو تھوک اجناس منڈیوں میں گزشتہ ہفتے چینی اوسطاً 51 روپے فی کوئنٹل مہنگی ہو گئی۔ چینی کے ساتھ دالوں کی قیمتوں میں بھی تیزی رہی جبکہ چاول کے بھاؤ گر گئے۔ خوردنی تیلوں میں اتار چڑھاؤ کا رجحان دیکھا گیا۔تہواروں کی مانگ آنے سے چینی میں ایک بار پھر تیزی آنے لگی ہے۔ گزشتہ ہفتے چینی کی اوسط قیمت 51 روپے بڑھ کر ہفتے کے اختتام پر 5,151 روپے فی کوئنٹل پر پہنچ گئی۔ دوسری طرف، گڑ کی قیمت 3 روپے فی کوئنٹل کم ہو گئی۔ خوردہ مارکیٹ میں بھی چینی میں 13 پیسے فی کوئنٹل کا اوسط اضافہ دیکھا گیا۔
ہفتے کے دوران چاول کی اوسط قیمت 27 روپے گھٹ کر ہفتے کے اختتام پر 4,124 روپے فی کوئنٹل رہ گئی۔ گزشتہ ہفتے بھی اس میں گراوٹ آئی تھی۔ گندم کی قیمت 2,886 روپے فی کوئنٹل پر تقریباً مستحکم رہی۔ آٹا بھی 3,364 روپے فی کوئنٹل پر کم و بیش بغیر کسی تبدیلی کے رہا۔ہفتے کے دوران ارہر دال کی اوسط قیمت 191 روپے اور چنے کی دال 102 روپے فی کوئنٹل بڑھ گئی۔ مونگ دال 43 روپے اور اڑد دال 42 روپے مہنگی ہو گئی۔ مسور دال کا بھاؤ بھی 13 روپے فی کوئنٹل چڑھ گیا۔
گزشتہ ہفتے مونگ پھلی کا تیل اوسطاً 72 روپے اور ونسپتی 22 روپے فی کوئنٹل مہنگا ہوا۔ سورج مکھی کے تیل میں 160 روپے اور پام آئل میں 8 روپے کی گراوٹ رہی۔ سویا تیل بھی 2 روپے پھسل گیا۔ سرسوں کے تیل کی قیمت تقریباً بغیر کسی تبدیلی کے رہی۔
