ووٹر لسٹوں کے اندراج میں کارکنان عوام کی رہنمائی کریں ٗ کوئی بھی شخص اندراج سے محروم نہ رہے ٗ بلاول بھٹو زرداری
پاکستان پیپلز پارٹی چیئرمین سے بلاول ہائوس میں وقار مہدی ٗ راشد ربانی اور نجمی عالم کی ملاقات ٗ تنظیمی امور پر تبادلہ خیال
کراچی(اسٹاف رپورٹر) پاکستان پیپلز پارٹی کے چیئرمین بلاول بھٹو زرداری نے پارٹی رہنمائوں کو ہدایت کی ہے کہ بلدیاتی انتخابات کی بھرپور تیاریاں شروع کی جائیں۔ بلاول بھٹو زرداری سے بلاول ہائوس میں پیپلز پارٹی سندھ کے جنرل سیکریٹری وقار مہدی‘ نائب صدر راشد ربانی اور پیپلز پارٹی کے رہنما نجمی عالم نے ملاقات کی۔ ملاقات میں سیاسی اور تنظیمی امور پر تبادلہ خیال کیا گیا۔ وقار مہدی نے ووٹر لسٹوں میں اندراج کے جاری عمل اور کنٹونمنٹ بورڈز کے انتخابات اور بلدیاتی اداروں کے انتخابات کی تیاریوں کے حوالے سے چیئرمین بلاول زرداری کو آگاہ کیا۔ پیپلز پارٹی کے چیئرمین نے ہدایت کی کہ بلدیاتی انتخابات کی بھرپور تیاریاں شروع کی جائیں۔ ووٹر لسٹوں کے اندراج میں کارکنان عوام کی رہنمائی کریں۔ کوئی بھی شخص جو ووٹ دینے کا اہل ہوچکا ہے وہ ووٹ کے اندراج سے محروم نہ رہے جبکہ نچلی سطح تک تنظیمی کام کو تیزی کے ساتھ مکمل کیا جائے۔