پولیس ہیڈ محرر اصغر پنہور کے ناروا رویے کی مذمت کرتے ہیں، ارباب ملاح

میہڑ (نمائندہ جسارت) سندھ ملاح فورم کے رہنماؤں ارباب ملاح، پنھل ملاح، غلام شبیر ملاح، نیاز ملاح، عبدالجبار ملاح اور دیگر کی رہنمائی میں ہیڈ محرر اصغر پنہور کی زیادتیوں کیخلاف نیشنل پریس کلب میہڑ کے سامنے احتجاجی مظاہرہ کیا اور سخت نعرے بازی کی۔ اس موقع پر انہوں نے کہا کہ ایک دن قبل میہڑ ککول پل پر مچھلی فروخت کرنے والے مزدوروں مٹھل ملاح، نذیر ملاح اور دیگر پر ہیڈ محرر اصغر پنہور نے تشدد کیا اور گالم گلوچ کی، جس کی ہم سخت مذمت کرتے ہیں۔ انہوں نے کہا کہ لاک ڈاؤن کے باعث ہر قسم کا تعاون کرنے کے باوجود مچھلی فروخت کرنے والے مزدوروں کو ہیڈ محرر اصغر پنہور کی جانب سے غیر اخلاقی زبان استعمال کی گئی اور ہم ملاح برادری کی دل آزاری کی ہے۔ انہوں نے ڈی آئی جی حیدر آباد، ایس ایس پی دادو سے مطالبہ کیا کہ میہڑ تھانے کے بدمست ہیڈ محرر کو جلد ہٹا کر ہم ملاح برادری سے انصاف کیا جائے بصورت دیگر احتجاجی تحریک چلائی جائے گی۔