اسلام آباد (آن لائن)پاکستان پیپلزپارٹی پارلیمنٹیرینز کی مرکزی سیکرٹری اطلاعات ڈاکٹر نفیسہ شاہ نے کہا ہے کہ عمرانی خواہش پر پی پی رہنمائوں کو نشانہ بنا یا جارہا ہے، سیاسی انجینئرنگ کے ذریعے نیب کا استعمال انتہائی شرمناک ہے۔ اپنے بیان میں ڈاکٹر نفیسہ شاہ نے کہا کہ نیب نے ملکی معیشت کا جنازہ نکال دیا ہے اور کاروباری طبقے سے تاوان طلب کرتا ہے۔ جو کاروباری طبقہ عمران خان کی اے ٹی ایم مشین بننے کے لئے تیار نہیں تھا عمران خان انہیں نیب کے ذریعے نشانہ بنا رہا ہے۔ انہوں نے کہا کہ سیاستدانوں سے پوچھا جاتا ہے کہ تمہارے دادا نے کیسے زمین خریدی تھی، کس سے خریدی؟ ڈاکٹر نفیسہ شاہ نے کہا کہ چیئرمین نیب کو چاہیے کہ اپنے کردار کا جائزہ لے۔ نیب کے چہرے اور دامن پر انسانی خون کے دھبے ہیں۔ سیاسی انجینئرنگ کے ذریعے نیب کا استعمال انتہائی شرمناک ہے۔