ٹنڈومحمدخان (نمائندہ جسارت) سندھ ملا ح فورم کی جانب سے سن شہر میں ملاح برادری کے قبرستان پر قبضے اور لاشوں کی بے حرمتی کیے جانے کیخلاف احتجاجی ریلی نکالی گئی اور پریس کلب کے سامنے احتجاجی مظاہرہ کیا گیا۔ تفصیلات کے مطابق سندھ ملاح فورم ٹنڈومحمدخان کی جانب سے ڈویژنل صدر پرویز علی ، ضلعی صدر سہیل ملاح ، وڈیرو قادر ملاح کی قیادت میں ٹنڈو سائیں داد سے ایک احتجاجی ریلی نکالی گئی جوکہ شہر کے مختلف راستوں سے ہوتی ہوئی پریس کلب پہنچی ، جہاں سندھ ملاح فورم کی جانب سے احتجاجی مظاہرہ کیا گیا۔ رہنمائوں نے مظاہرین سے خطاب کرتے ہوئے کہاکہ سن شہر میں ظفر شاہ اور اس کے دیگر ساتھیوں کی جانب سے ملاح برادری کے قبرستان سے 12 لاشیں نکال کر ان کی بے حرمتی کی گئی ، جس کی ہم پرزورالفظ میں مذمت کرتے ہیں۔مظاہرین نے مطالبہ کیا کہ سن شہر میں لاشوں کی بے حرمتی کا فوری طور پر نوٹس لیا جائے ، بصورت دیگر ملاح برادری سندھ بھر میں احتجاجی مظاہر ے کرے گی۔