آئی سی سی نے بھارت کیخلاف میچ میں شاہین آفریدی کے اسپیل کو ’پلے آف دی ٹورنامنٹ‘ قرار دے دیا

انٹرنیشنل کرکٹ کونسل (آئی سی سی) نے بھارت کے خلاف ٹی20 ورلڈ کپ کے میچ میں شاہین آفریدی کی جانب سے کرائے گئے تباہ کن اسپیل کو ’پلے آف دی ٹورنامنٹ‘ قرار دیا ہے۔

متحدہ عرب امارات میں بھارت کی میزبانی میں کھیلے گئے ٹی20 ورلڈ کپ میں پاکستان نے اپنا پہلا میچ روایتی حریف کے خلاف کھیلا تھا۔

پاکستان نے بھارت کے خلاف ٹاس جیت کر پہلے باؤلنگ کا فیصلہ کیا اور شاہین شاہ آفریدی نے شاندار اسپیل سے میچ کا پانسہ پاکستان کے حق میں پلٹ دیا تھا۔

شاہین نے پہلے ہی اوور میں روہت شرما کو کھاتا کھولنے کا موقع دیے بغیر ہی ایل بی ڈبلیو کردیا تھا اور پھر اپنے اگلے اوور میں دوسرے اوپنر لوکیش راہل کی وکٹیں بکھیر کر بھارت کو چھ رنز پر دوسرا نقصان پہنچایا تھا۔

The winner of the @Nissan Play of the Tournament from the 2021 ICC Men’s #T20WorldCup is:

Shaheen Afridi’s blistering opening spell against India 🔥 pic.twitter.com/uv94PnVd89

— ICC (@ICC) November 17, 2021

اس نقصان سے بھارتی ٹیم سنبھل نہ سکی تھی اور مقررہ اوورز میں 7 وکٹوں کے نقصان پر 151 رنز بنائے تھے۔

شاہین شاہ آفریدی نے عمدہ باؤلنگ کرتے ہوئے میچ میں تین وکٹیں لی تھیں جس میں بھارتی کپتان ویرات کوہلی کی وکٹ بھی شامل تھی اور انہیں میچ کا بہترین کھلاڑی قرار دیا گیا تھا۔

پاکستان نے اوپنرز کے عمدہ کھیل کی بدولت میچ میں بغیر کسی نقصان کے ہدف حاصل کر کے 10 وکٹوں سے فتح حاصل کی تھی۔

پاکستان کی ٹیم نے پورے ٹورنامنٹ میں بہترین کھیل پیش کرتے ہوئے پانچوں میں فتوحات حاصل کی تھی اور ناقابل شکست رہتے ہوئے سیمی فائنل میں جگہ بنائی تھی۔

البتہ سیمی فائنل آسٹریلیا نے سنسنی خیز مقابلے کے بعد پاکستان کو 5 وکٹوں سے شکست دے کر ٹورنامنٹ سے باہر کردیا تھا۔

منبع: ڈان نیوز