پی سی بی نے کورونا سے نمٹنے کے لیے اقدامات شروع کردیے ہیں جبکہ گراﺅنڈ اسٹاف کی کووڈ ٹیسٹنگ بھی شروع کردی گئی ہے۔
تفصیلات کے مطابق کورونا وائرس کے بڑھتے کیسز کے بعد پی سی بی نے گرانڈ اسٹاف کی کووڈ ٹیسٹنگ شروع کردی ہے جبکہ پی سی بی اسٹاف کو بھی ویکسی نیشن بوسٹر ڈوز لگانے کا فیصلہ کیا گیا ہے۔اندرونی اجلاس بھی زوم پر ہی کرانے کی حکمت عملی تیار کی گئی ہے جبکہ کووڈ پروٹوکولز کو یقنی بنانے پر زور دیتے ہوئے ملاقاتوں کو بھی محدود کردیا گیا ہے۔
دوسری جانب پی سی بی نے پی ایس ایل سیزن 7 کے انعقاد کو ہر صورت یقینی بنانے کے لیے پروٹوکولز تیار کرلیے ہیں جس پر سختی سے عمل در آمد کرنے کی ہدایات جاری کی گئی ہیں۔واضح رہے کہ پی ایس ایل 7 کی آن لائن ٹکٹ کی فروخت کا عمل 11 جنوری سے شروع ہوگیا ہے جبکہ ایونٹ کا آغاز 27 جنوری سے کراچی کے نیشنل اسٹیڈیم میں شروع ہوگا جس کا ابتدائی میچ کراچی کنگز اور ملتان سلطانز کے درمیان کھیلا جائے گا۔ایونٹ کا فائنل 27 فروری کو لاہور کے قذافی اسٹیڈیم میں کھیلا جائے گا۔
