اسلام آباد(مانیٹرنگ ڈیسک+مانیٹرنگ ڈیسک)حکومت کی جانب سے عوام پر پیٹرول بم گرانے کے بعد اب گھریلو صارفین کے لیے بجلی مزید 95 پیسے مہنگی کرنے کی تیاریاں کی جارہی ہیں۔ حکومت نے بجلی کے بنیادی ٹیرف میں 95 پیسے فی یونٹ تک اضافے کی درخواست دے دی جس پر نیپرا کی سماعت مکمل ہوگئی۔حکومت کی درخواست میں تمام سلیبز کے لیے فی یونٹ بجلی 8 پیسے سے95 پیسے تک مہنگی کرنے تجویز گئی ہے، بنیادی ٹیرف میں اضافے سے سالانہ 20 ارب روپے کی سبسڈی ختم کی جائے گی۔علاوہ ازیں چیئرمین نیپرا توصیف ایچ فاروقی نے کہا ہے کہ بل میں کم سے کم ٹیکس بھی اگر صارفین سے لے رہے ہیں تو وہ 21 فیصد ہے۔ بجلی بل پر زیادہ سے زیادہ ٹیکسز کی شرح 29 فیصد ہے، وزارت خزانہ سے کہا ہے کہ مہربانی کریں یہ کوئی ٹیکس اکٹھا کرنے والا ادارہ نہیں۔چیئرمین نیپرا توصیف ایچ فاروقی کی صدارت میں نیپرا سماعت پر معاملہ زیر بحث آیا ۔ چیئرمین نیپرا نے کہا وزیر خزانہ نے یقین دہانی کرائی ہے کہ وہ اس معاملے پر غور کریں گے۔