برج ٹائون(جسارت نیوز)ویسٹ انڈین ٹیم انگلینڈ کے خلاف دوسرے ٹیسٹ کے چوتھے روز اپنی پہلی اننگز میں 411 رنز بنا کر آئوٹ ہو گئی اور اسے 96 رنز خسارے کا سامنا کرنا پڑا، کپتان کریگ براتھویٹ نے شاندار بیٹنگ کا مظاہرہ کیا اور 160 رنز بنائے، یہ ان کے کیریئر کی دسویں سنچری ہے، الزاری جوزف 19، جیسن ہولڈر 12، جوشوا ڈا سلوا 33، کیمار روچ ایک اور ویرا سیمی پرموئل 5 رنز بناکر آئوٹ ہوئے۔ انگلینڈ کی طرف سے جیک لیچ نے تین جبکہ بین اسٹوکس اور ثاقب محمود نے دو، دو وکٹیں حاصل کیں۔ چوتھے روز کھیل کے اختتام پر انگلینڈ نے اپنی دوسری اننگز میں بغیر کسی نقصان کے 40 رنز بنا لئے اور 136 رنز کی مجموعی برتری حاصل ہو گئی ہے۔