اسلام آباد: ایم کیو ایم نے کہا ہے کہ ہمیں حکومتی بینچوں سے اپوزیشن بینچوں کی جانب جانے میں زیادہ وقت نہیں لگے گا۔ اگر ہماری بات نہیں ماننی تو ہم ایسی وزارتوں پر” تھو ” بھی نہیں کرتے۔
بدھ کوقومی اسمبلی میں اظہار خیال کرتے ہوئے ایم کیو ایم کے رکن صابر قائم خانی کا کہنا تھا کہ بجٹ میں ہمارے علاقوں کے منصوبوں کو کوئی ترجیح نہیں دی گئی۔ اگر ہماری بات نہیں ماننی تو ہم ایسی وزارتوں پر تھو بھی نہیں کرتے۔
اسپیکر قومی اسمبلی راجہ پرویز اشرف کی صدارت میں قومی اسمبلی کے اجلاس میں اظہار خیال کرتے ہوئے ایم کیو ایم کے رکن صلاح الدین کا کہناتھا کہ ایم کیو ایم نے اس حکومت کے لیے بھاری سیاسی قیمت ادا کی ہے۔ ہمیں حکومتی بینچوں سے دوسری جانب جانے میں زیادہ وقت نہیں لگے گا۔
ایم کیو ایم کے ارکان قومی اسمبلی نے احتجاج کرتے ہوئے ایوان سے واک آٹ کرنے کی دھمکی دی۔
