لاہور: پنجاب میں الیکشن کی تاریخ لینے کے لیے تحریک انصاف نے عدالت عالیہ لاہور سے رجوع کرلیا۔
ہائی کورٹ میں دائر درخواست میں تحریک انصاف نے گورنر پنجاب کو بذریعہ سیکرٹری فریق بنایا ہے۔ درخواست بیرسٹر علی ظفر کے ذریعے سے دائر کی گئی ہے، جس میں کہا گیا ہے کہ آئین کے مطابق اسمبلی تحلیل ہونے کے فوری بعد گورنر نے الیکشن کا اعلان کرنا ہوتا ہے۔
پی ٹی آئی کی درخواست میں مؤقف اختیا رکیا گیا ہے کہ گورنر پنجاب الیکشن کی تاریخ کا اعلان نہیں کر رہے جو کہ آئین کی خلاف ورزی ہے ۔ 10 دن سے زائد کا وقت گزر چکا ہے، گورنر پنجاب کی جانب سے تاحال الیکشن کی تاریخ کا اعلان نہیں کیا گیا۔گورنر اپنے حلف کی خلاف ورزی کر رہے ہیں ۔
درخواست میں استدعا کی گئی ہے کہ لاہور ہائیکورٹ پنجاب میں الیکشن کی تاریخ دینے کے لیے گورنر کو ہدایات جاری کرے ۔
