لاہور : امیر تحریک لبیک پاکستان حافظ سعد حسین رضوی نے کہا کہ چیئرمین سینٹ و ڈپٹی چیئرمین سینٹ مراعات بل غریب عوام کی جیب پر بہت بڑا ڈاکا ہے ۔ موجودہ حالات میں غریب عوام اپنا بوجھ برداشت نہیں کر پا رہے تو وہ چیئرمین و ڈپٹی چیئرمین سینٹ کا بوجھ کیسے برادشت کرینگے۔
حافظ سعد حسین نے کہا کہ بل پیش و منظورکرنے والوں کو شرم آنی چاہیے تھی کہ وہ اپنی عیش و عشرت کے لیے غریب کے بچوں کے منہ کا نوالہ چھین رہے ہیں۔ عوام دشمن بل کی سخت مذمت کرتے ہیں ۔ ملک معاشی طور پر کمزور ہے ایسے میں چیئرمین سینٹ و ڈپٹی چیئرمین کی مراعات میں مزید اضافہ عوام دشمنی ہے۔
انہوں نے کہا کہ چیئرمین سینٹ و ڈپٹی چیئرمین ملکی معاشی صورتحال کے پیش نظر رضاکارانہ طور پر حاصل کردہ تمام مراعات سے دستبردار ہوجانا چاہیے۔غریب عوام اب مزید اراکین اسمبلی، سینٹ ، بیوروکریٹس سمیت اشرافیہ کا بوجھ برداشت نہیں کرسکتی۔