یونان: گزشتہ ماہ یونان میں تارکین وطن کی کشتی کو حادثہ پیش آیا تھا جس میں سینکڑوں تارکین وطن اپنی جان کی بازی ہار گئے تھے ان میں کچھ پاکستانی بھی شامل تھے جن میں ایک پولیس اہلکار بھی شامل تھا جو کشتی حادثے میں بچ جانے پر پاکستان واپس اپنے گھر پہنچ گیا ہے ۔
خاندانی ذرائع نے تصدیق کی کہ عثمان صدیق جو اس سانحے میں بچ جانے والے 12 پاکستانیوں میں شامل تھے، جمعہ کو گجرات کے نواحی گاؤں کالیکی میں اپنے آبائی شہر پہنچے، لوگوں سے ملاقات کی ہے جن کے پیارے اس حادثے میں ہلاک ہو گئے تھے۔
28 سالہ صدیق گجرات پولیس میں کانسٹیبل تھے لیکن انہوں نے ایک سال کی چھٹی لی اور اپنے چار دوستوں کے ساتھ اٹلی جانے کا فیصلہ کیا وہ مئی میں گجرات سے لیبیا کے لیے روانہ ہوئے۔
اپنی رہائش گاہ پر صدیق نے صحافیوں کو بتایا کہ جہاز کے عملے نے کشتی پر سوار ہونے سے پہلے لائف جیکٹس کی فراہمی کے لیے رقم جمع کی۔
صدیق کے مطابق کشتی میں کم از کم 700 افراد سوار تھے جن میں تقریباً 350 پاکستانی تھے،جن میں زیادہ تر کا تعلق گجرات، گوجرانوالہ، منڈی بہاؤالدین اور آزاد کشمیر کے علاقوں سے تھا۔
انہوں نے دعویٰ کیا کہ کشتی راستے میں جانے کے بعد سمندر میں پھنس گئی تھی،ڈوبنے سے تقریباً 12 گھنٹے قبل ایک ہیلی کاپٹر نے تصویریں کھینچیں اور اڑ گیا،اسی دن ایک کارگو جہاز بھی کشتی کے قریب ایک گھنٹے سے زیادہ رکا تھا عملے نے انہیں پانی کی بوتلیں اور روٹی دی۔
ان کا کہنا تھا کہ ’’رات 11 بجے کے قریب ایک اور جہاز جائے وقوعہ پر پہنچا اور ہماری کشتی کو رسی سے باندھا، لیکن جیسے ہی جہاز نے کشتی کو کھینچا، وہ ٹوٹنے لگی”لوگوں کے ڈوبنے کی وجہ سے ایک چیخ و پکار تھی۔ کچھ لوگوں نے گرنے کے بعد رسی کو تھام لیا، جس سے وہ زندہ رہے”، انہوں نے مزید کہا کہ ایک سیاحتی جہاز صبح سویرے پہنچا اور 100 سے زائد افراد کو ساحل تک پہنچانے میں کامیاب ہوا۔