کراچی: پاکستان کرکٹ ٹیم کے سابق کپتان اور سابق چیف سلیکٹر شاہد خان آفریدی نے پاکستان میں سیکورٹی کے معاملے پر منفی بیان دینے پر جے شاہ کو کرارا جواب دیدیا۔
خبر رساں اداروں کے مطابق ایشین کرکٹ کونسل (اے سی سی) کے صدر اور بھارتی کرکٹ بورڈ (بی سی سی آئی) کے سربراہ جے شاہ کے متنازع بیان کا جواب دیتے ہوئے شاہد آفریدی نے ایکس (سابقہ ٹوئٹر) پر اپنے بیان میں کہا کہ پاکستان میں سیکورٹی کے حوالے سے جے شاہ کا بیان دیکھا، میں ان (جے شاہ) کی یادداشت کو پھر سے تازہ کرنے کے لیے بتاؤں کہ پاکستان گزشتہ 6 برسوں کے دوران کتنی غیر ملکی ٹیموں اور کھلاڑیوں کی میزبانی کر چکا ہے۔
I came across Mr @JayShah’s statement about security situation in Pakistan. Just to refresh his memory, Pakistan has hosted the following foreign players/teams in the past six years:
2017 – ICC World XI SL
2018 – WI
2019 – WI (W), BD (W) SL
2020 – BD, PSL, MCC Zim
2021 –…— Shahid Afridi (@SAfridiOfficial) September 6, 2023
شاہد آفریدی نے اپنی سوشل میڈیا پوسٹ میں تفصیل بتاتے ہوئے لکھا کہ 2017ء تا 2023ء پاکستان میں کون کون سی بین الاقوامی ٹیمیں کرکٹ کھیل چکی ہیں۔ شاہد آفریدی نے لکھا کہ مسٹر شاہ اس بات میں بھی کوئی شک نہیں کہ پاکستان 2025ء کی چیمپئنز ٹرافی میں بھارت کی میزبانی کے لیے بھی تیار ہے۔
واضح رہے کہ اے سی سی کے صدر اور بی سی سی آئی کے سربراہ جے شاہ نے ایشیا کپ کے پاکستان میں میچز نہ کروانے کے حوالے سے متنازع بیان دیا تھا، جس میں ان کا کہنا تھا کہ براڈکاسٹرز اور میڈیا رائٹس ہولڈرز پاکستان میں ایشیا کپ کے تمام میچ کروانے سے کترا رہے تھے، جس کی بڑی وجہ سیکورٹی اور معاشی حالات تھے۔