لاہور: پنجاب کی نگراں حکومت نے صوبے میں ہوا کے معیار میں بہتری کے بعد لاک ڈاؤن کو ہٹا دیا ہے۔
پنجاب کے نگراں وزیر اعلیٰ محسن نقوی نے جمعہ کو ایک مراسلہ میں لکھا، “حالیہ بارشوں کے بعد ہوا کے معیار میں بہتری کا اندازہ لگانے کے بعد، ماہرین اور محکمہ ماحولیات پنجاب کے ساتھ مشاورت کے بعد، ہم نے لاک ڈاؤن کو ہٹانے کا فیصلہ کیا ہے۔”
ان کا کہنا تھا کہ بازار کھلیں گے، اور ریستوران شام 6 بجے کے بعد دوبارہ کام شروع کر سکتے ہیں۔اسموگ سے متعلق حالیہ پابندیاں کل صبح سے اٹھا لی جائیں گی۔ تمام تعلیمی ادارے اتوار تک بند رہیں گے ۔
ایک دن قبل، پنجاب حکومت نے سموگ کو کم کرنے اور آسمان کو صاف رکھنے کے لیے صوبے کے متعدد اضلاع میں اسمارٹ لاک ڈاؤن نافذ کیا۔
چار روزہ لاک ڈاؤن میں اسکول اور بازار بند تھے اور لوگوں کو ناگزیر ضرورتوں کے علاوہ گھروں سے نہ نکلنے کا مشورہ دیا گیا تھا۔
اسمارٹ لاک ڈاؤن ابتدائی طور پر جمعرات سے اتوار تک چار دن کے لیے نافذ کیا گیا تھا۔ تاہم، بعد میں حکومت نے آٹھ اضلاع میں پہلے دو دنوں کے لیے لاک ڈاؤن میں نرمی کرنے کا فیصلہ کیا۔
جن اضلاع میں نرمی کی گئی ان میں لاہور، ننکانہ صاحب، شیخوپورہ، قصور، گوجرانوالہ، نارووال، حافظ آباد اور سیالکوٹ شامل ہیں۔
