کوئٹہ: وزیراعلیٰ بلوچستان کے بیرون ملک روانہ ہونے کے باعث صوبائی کابینہ کی تشکیل نہیں ہو سکی۔
نجی ٹی وی کی رپورٹ میں ذرائع کے حوالے سے بتایا گیا ہے کہ بلوچستان کابینہ کی تشکیل ایک بار پھر تاخیر کا شکار ہو گئی، جس کی وجہ بتائی گئی ہے کہ وزیراعلیٰ سرفراز بگٹی اپنے بھائی کے علاج کی غرض سے ملک سے باہر گئے ہیں، جس کی وجہ سے صوبائی کابینہ کی تشکیل تاحال نہیں ہو سکی ہے۔
ذرائع کا کہنا ہے کہ وزیراعلیٰ بلوچستان سرفراز بگٹی کے آئندہ 2 سے 2 دن میں پاکستان واپس آنے کے بعد صوبائی کابینہ کا اعلان کیا جائے گا۔
یاد رہے کہ بلوچستان کابینہ کی تشکیل نہ پانے سے صوبے میں کئی معاملات زیر التوا ہیں، جن میں محکمہ خوراک کی جانب سے گندم کی خریداری ،صوبے کی 3 جامعات میں وائس چانسلرزکی تعیناتی اور کوئٹہ میں بلدیاتی انتخابات کے حوالے سے نئی قانون سازی کی منظوری سمیت مختلف وزارتوں کے امور شامل ہیں۔