اسلام آباد:محکمہ موسمیات نے درجہ حرارت میں اضافے کے گلیشیئر سے بنی جھیلیں پھٹنے کا خدشہ ظاہر کرتے ہوئے مقامی انتظامیہ کو وارننگ جاری کردی ہے۔
میڈیا رپورٹس کے مطابق محکمہ موسمیات نے کہا ہے کہ درجہ حرارت میں اضافے کے باعث گلگت بلتستان اور خیبر پختونخوا میں گلیشیئر سے بنی جھیلیں پھٹنے کا خدشہ ہے، 21 تا 27 مئی گلگت بلتستان اور خیبرپختونخوا میں درجہ حرارت 4 سے 6 ڈگری زائد رہے گا۔
محکمہ موسمیات کا کہناتھا کہ درجہ حرارت بڑھنے سے فلیش فلڈز آنے کے امکانات بڑھ جائیں گے، جس کے بعد برفانی جھیلیں پھٹنے سے سیلاب آسکتے ہیں، ضلعی انتظامیہ، مقامی تنظیموں اور مقامی آبادیوں کو محتاط رہنے کی ضرورت ہے۔
