اسلام آباد: (آن لائن) اسلام آباد ہائی کورٹ نے عدالتی حکم کے باوجود پاکستان تحریک انصاف کی سابق رہنما شیریں مزاری کا نام ای سی ایل سے نہ نکالنے کے خلاف توہین عدالت کیس میں وزارت داخلہ سے رپورٹ طلب کر لی۔رپورٹ آئندہ 24 گھنٹے میں پیش کرنے کی ہدایت کی گئی ہے۔جمعرات کواسلام آباد ہائی کورٹ کی جسٹس ثمن رفعت امتیاز نے کیس کی سماعت کی، شیریں مزاری اپنے وکیل احسن پیرزادہ کے ساتھ عدالت میں پیش ہوئیں۔عدالت نے جمعہ کوصبح ساڑھے 9 بجے تک وزارت داخلہ سے رپورٹ طلب کر لی۔یاد رہے کہ عدالتی حکم پر عمل درآمد نہ ہونے پر شیریں مزاری نے توہین عدالت کی درخواست دائر کر رکھی ہے۔واضح رہے کہ 4 اپریل کو اسلام آباد ہائی کورٹ نے شیریں مزاری کا نام ای سی ایل سے نکالنے کا حکم دیا تھا۔