کراچی ( اسٹاف ر پورٹر) وزیراعلیٰ سندھ مراد علی شاہ اورنیب کے چیئرمین لیفٹیننٹ جنرل (ر) نذیر احمد نے کرپشن کے خاتمے کے لیے صوبائی حکومت اور نیب کے درمیان تعاون پر تبادلہ خیال کیا۔ اجلاس وزیراعلیٰ ہاؤس میں منعقد ہوا۔ جس میں چیف سیکرٹری آصف حیدر شاہ، وزیراعلیٰ کے پرنسپل سیکرٹری آغا واصف، سینئر رکن بورڈ آف ریونیو بقا اللہ انڑ، سیکرٹری جنگلات و جنگلی حیات بدر جمیل ودیگر کی شرکت جبکہ چیئرمین نیب کی معاونت ڈی جی نیب کراچی جاوید اکبر ریاض، ڈی جی سکھر فیاض قریشی، ڈی جی آپریشنز طارق بٹ اور دیگر نے کی۔ چیئرمین نیب نے وزیراعلیٰ کو صوبے سے متعلق جاری انکوائریوں اور تحقیقات میں ہونے والی اہم پیشرفت سے آگاہ کیا۔ وزیر اعلیٰ اور چیئرمین نیب نے موثر ہم آہنگی اور ٹھوس کاوشوں کے ساتھ بدعنوانی کے خاتمے کے لیے اپنے عزم کا اعادہ کیا۔اجلاس میں 1.8 ملین ایکڑ سے زیادہ رقبے پر پھیلے ہوئے جنگلات کو 3.6 ٹریلین روپے کی مالیت سے حاصل کیا ہے اور اس کی اصل ملکیت بھی بحال کرکے بتادی گئی ہے۔ وزیراعلیٰ سندھ اور چیئرمین نیب نے جنگلات سے متعلق بقیہ مسائل آئندہ3 ماہ میں حل کرنے پر اتفاق کیا۔