جماعتِ اسلامی پاکستان کے امیر حافظ نعیم الرحمن نے ملک گیر شٹر ڈاؤن ہڑتال کو حکمرانوں کے لیے نوشتہ دیوار قراردیتے ہوئے کہا ہے کہ عوام نے کامیاب ہڑتال کر کے ثابت کر دیا ہے کہ وہ بجلی کی قیمتوں میں اضافہ کسی طور برداشت نہیں کریں گے۔
حافظ نعیم الرحمان کا کہنا تھا کہ عوام حکمرانوں کی عیاشیوں کے خرچے مزید اٹھانے کو تیار نہیں، جاگیرداروں پر ٹیکس لگایا جائے، آج ہماری اپیل پر تمام شعبہ ہائے زندگی سے وابستہ افراد پرامن ہڑتال کررہے ہیں، آج چترال سے لے کر کراچی تک کامیاب ہڑتال جاری ہے۔
انہوں نے کہا کہ جو ملک و قوم کے حق میں ہے، ہم وہ کریں گے،جاگیرداروں پر ٹیکس لگایا جائے، حکمران طبقہ اپنے خرچے کم کرے۔ حکومت تاجر دوست کے نام پر اسکیمیں متعارف کرارہی ہے، کوئی تاجر تنظیم حکومتی جھانسے میں نہیں آئے گی۔
انہوں نے مزید کہا کہ ہمارا احتجا جاری رہے گا ہم عوام کے حقوق کے لیے آواز بلند کرتے رہیں گے،حکمرانوں کا ٹولہ عوام پر مسلط ہے ،ان حکمرانوں کو عوامی مسائل و مشکلات سے کوئی سروکار نہیں،اب حکمرانوں کے دن گنے جاچکے ہیں۔