روسی وزیر خارجہ سرگئی لاوروف نے امریکا کو “ریڈ لائنز” سے مذاق نہ کرنے کی دھمکی دیدی۔
روسی وزیر خارجہ سرگئی لاوروف نے یوکرین کو طویل فاصلے تک مار کرنے والے امریکی میزائلوں کی ممکنہ ترسیل پر تنبیہ کرتے ہوئے کہا ہے کہ امریکا روس کی “ریڈ لائنز” سے مذاق نہ کرے۔
لاوروف نے کہا کہ امریکا سرد جنگ کے بعد کے سیکیورٹی توازن کو نظرانداز کر رہا ہے، جو ماسکو اور واشنگٹن کے درمیان باہمی روک تھام کی بنیاد تھا۔
انہوں نے امریکی اقدام پر تبصرہ کرتے ہوئے کہا کہ اگر امریکا یوکرین کو JASSM کروز میزائل فراہم کرتا ہے، جو روس کے اندر تک پہنچ سکتے ہیں، تو یہ ایک خطرناک پیش رفت ہوگی۔ یوکرینی صدر ولادیمیر زیلنسکی اسلحے کی ترسیل کے لیے لابنگ کر رہے ہیں۔
لاوروف نے روسی ٹی وی کو دیے ایک انٹرویو میں کہا، “امریکا پہلے ہی ان حدود کو عبور کر چکا ہے جو اس نے خود مقرر کی تھیں، اور یہ عمل جاری ہے۔ یوکرینی صدر زیلنسکی یقیناً اس صورتحال کا فائدہ اٹھا رہے ہیں،” انہوں نے مزید کہا، “لیکن امریکا کو ہماری ‘ریڈ لائنز’ کے بارے میں مذاق نہیں کرنا چاہیے۔”