پشاور: مولانا فضل الرحمن آئندہ5 سال کیلیے پانچویں بار بلامقابلہ ایک بار پھر جمعیت علمائے اسلام (ف) کے امیر منتخب ہوگئے، جے یو آئی ف کے انٹرا پارٹی الیکشن پشاور میں منعقد ہوئے۔
میڈیا رپورٹس کے مطابق انٹرا پارٹی انتخابات میں پارٹی کی مرکزی کونسل کے پندرہ سور ارکان نے مرکزی امیر اور جنرل سیکریٹری کا انتخاب کیا، مرکزی جنرل کونسل کے تمام ارکان نے متفقہ طور پر مولانا فضل الرحمن کو 5 سال کے لیے بلامقابلہ امیر منتخب کرلیا جب کہ مولانا عبدالغفور حیدری کو بلامقابلہ جنرل سیکریٹری منتخب کرلیا گیا۔
خیال رہے کہ چند روز قبل مولانا فضل الرحمن کے بھائی مولانا عطا الرحمن جے یو آئی خیبر پختونخوا کے پارٹی انتخابات میں 5 سال کے لیے صوبائی امیر منتخب ہوئے تھے،چند روز قبل الیکشن کمیشن نے جے یو آئی کو پارٹی انتخابات کروا کر تفصیلات جمع کرانے کی ہدایت کی تھی۔