اسلام آباد:پاکستان تحریک انصاف کے ڈی چوک احتجاج کے سلسلے میں آنے والی عمران خان کی دونوں بہنوں کو پولیس نے گرفتار کرلیا۔
میڈیا رپورٹس کے مطابق بانی چیئرمین پی ٹی آئی اور سابق وزیراعظم عمران خان کے دونوں بہنوں علیمہ خان اور عظمیٰ خان کو پولیس نے ڈی چوک اسلام آباد سے گرفتار کرکے تھانہ سیکرٹریٹ منتقل کردیا ہے۔
یاد رہے کہ تحریک انصاف کی جانب سے آج وفاقی دارالحکومت اسلام آباد میں ڈی چوک پر احتجاج کی کال دی گئی تھی، جس کے بعد سخت پابندیوں اور رکاوٹوں کے باوجود پی ٹی آئی کے کارکن ڈی چوک پہنچنا شروع ہوئے۔ اسی دوران عمران خان کی دونوں بہنیں علیمہ خان اور عظمیٰ خان بھی ڈی چوک احتجاج میں شریک ہونے کے لیے پہنچیں تاہم انہیں پولیس نے گرفتار کرلیا۔
اس کے علاوہ پولیس کی جانب سے ڈی چوک آنے والے پی ٹی آئی کے کئی دیگر کارکنوں کو بھی گرفتار کرلیا گیا ہے جب کہ کچھ مقامات پر پولیس اور کارکنوں میں جھڑپوں کی اطلاعات بھی موصول ہو رہی ہیں۔