صنعا :امریکی فوج نے کہا ہے کہ اس نے یمن میں حوثیوں کے زیر انتظام مختلف شہروں کے 15 مقامات پر حملے کیے ہیں جہاں شہریوں نے فوجی مراکز اور ایئرپورٹ پر دھماکوں کی تصدیق کی ہے۔
غیر ملکی میڈیا کے مطابق امریکا نے یمن میں بمباری کرتے ہوئے دارالحکومت صنعا اور حُدیدہ کے ایئرپورٹ سمیت چار صوبوں کو نشانہ بنایا ہے۔
غیر ملکی میڈیا کے مطابق امریکی مشرق وسطی میں موجود فوج کی نگرانی کرنے والے سینٹرل کمانڈ نے بتایا کہ جن مقامات کو نشانہ بنایا گیا ہے وہ حوثیوں کے فوجی صلاحیت کے حامل تھے لیکن یہ واضح نہیں کیا کہ وہاں میزائل، ڈرون یا ریڈار کا نظام بھی شامل تھا۔
حوثیوں کے سرکاری نشریاتی ادارے المسیرہ ٹی وی اور شہریوں نے کہا کہ یمن کے دارالحکومت صنعا اور حدیدہ ایئرپورٹ سمیت کئی علاقوں میں فضائی حملے کیے گئے ہیں، دمار شہر کے جنوبی علاقے اور البائیدہ صوبے کے جنوب مشرقی علاقوں کو نشانہ بنایا گیا ہے۔
امریکی سینٹرل کمانڈ نے سماجی رابطے کی ویب سائٹ ایکس پر بیان میں کہا کہ یمن پر حملے دوپہر کے دوران کیا گیا۔
