اسلام آباد: عالمی بینک کی تازہ ترین رپورٹ میں انکشاف کیا گیا ہے کہ پاکستان کی موجودہ معاشی ترقی کی رفتار غربت میں کمی کے لیے ناکافی ہے۔
رپورٹ کے مطابق رواں مالی سال ملک میں معاشی شرحِ نمو صرف 3 فیصد رہنے کا امکان ہے، جو غربت کے خاتمے یا عوامی معیارِ زندگی بہتر بنانے کے لیے مطلوبہ رفتار سے بہت کم ہے۔
عالمی بینک کے اندازے کے مطابق پاکستان میں اس سال غربت کی شرح 21.5 فیصد تک رہ سکتی ہے جب کہ اگلے مالی سال میں معاشی ترقی کی رفتار معمولی بہتری کے ساتھ 3.4 فیصد تک پہنچنے کا امکان ظاہر کیا گیا ہے۔
رپورٹ میں واضح کیا گیا کہ جب تک معاشی سرگرمیوں میں تیزی، سرمایہ کاری میں اضافہ اور روزگار کے مواقع نہیں بڑھائے جاتے، غربت میں نمایاں کمی ممکن نہیں۔
رپورٹ کے مطابق پاکستان میں ہر سال تقریباً 16 لاکھ نوجوان روزگار کی منڈی میں داخل ہوتے ہیں، مگر معیشت کی سست رفتار کے باعث اتنے بڑے پیمانے پر روزگار کے مواقع پیدا نہیں ہو پا رہے۔ عالمی بینک نے خبردار کیا ہے کہ اگر روزگار کے نئے مواقع نہ بنائے گئے تو غربت کے دائرے میں مزید اضافہ ہوسکتا ہے۔
رپورٹ میں مزید کہا گیا ہے کہ پاکستان میں مہنگائی کی شرح رواں مالی سال 7.2 فیصد تک رہنے کا امکان ہے، جو عوام کی قوتِ خرید کو متاثر کر رہی ہے۔ اگلے مالی سال مہنگائی میں معمولی کمی متوقع ہے اور یہ 6.8 فیصد تک آسکتی ہے، تاہم یہ کمی بھی عام شہری کے معیارِ زندگی میں خاطرخواہ بہتری نہیں لا سکے گی۔
عالمی بینک نے زور دیا ہے کہ پاکستان کو اپنے مالیاتی ڈھانچے میں بنیادی اصلاحات، سرمایہ کاری کے فروغ، برآمدات میں اضافے اور توانائی کے شعبے میں پائیدار پالیسیوں پر توجہ دینا ہوگی۔ رپورٹ کے مطابق پالیسیوں کا تسلسل، ادارہ جاتی شفافیت اور نجی شعبے کے لیے آسانیاں معیشت کو استحکام دینے کے لیے ناگزیر ہیں۔
مزید برآں عالمی بینک نے حکومتِ پاکستان کو تجویز دی ہے کہ غربت میں کمی کے لیے صرف معاشی ترقی پر انحصار نہ کیا جائے بلکہ سماجی تحفظ، تعلیم اور صحت کے شعبوں میں بھی ٹھوس اصلاحات کی جائیں۔ ادارے کا کہنا ہے کہ اگر پاکستان مسلسل اقتصادی نظم و ضبط برقرار رکھے اور جامع اصلاحاتی پالیسیوں پر عمل کرے تو آئندہ برسوں میں پائیدار ترقی ممکن ہے۔
