پاکستان تحریک انصاف (پی ٹی آئی) کے رہنما سلمان اکرم راجا نے پنجاب میں پارٹی عہدوں اور خیبر پختونخوا میں قیادت کی تبدیلی سے متعلق گردش کرنے والی خبروں کی وضاحت کر دی ہے۔
اسلام آباد میں میڈیا سے گفتگو کرتے ہوئے سلمان اکرم راجا نے بتایا کہ انہیں جیل میں داخل ہونے سے قبل یہ اطلاع ملی تھی کہ بانی پی ٹی آئی نے پنجاب میں احمد چٹھہ کو عہدے سے ہٹانے کا حکم دیا ہے، جس کے بعد عالیہ حمزہ نے بطور صدر احمد چٹھہ کو ان کے عہدے سے ہٹا دیا۔
انہوں نے تاہم واضح کیا کہ ان کی موجودگی میں بانی پی ٹی آئی نے پنجاب میں کسی بھی سطح پر کوئی تبدیلی کا حکم نہیں دیا، بانی پی ٹی آئی نے صرف سہیل آفریدی کو خیبر پختونخوا میں مکمل اختیارات دینے کی ہدایت کی ہے، جبکہ صوبے میں کسی ایڈوائزری کونسل کے قیام کی تجویز پیش نہیں کی گئی۔
سلمان اکرم راجا نے مزید کہا کہ اسلام آباد ہائیکورٹ نے اڈیالہ جیل میں ملاقاتوں کے حوالے سے فہرست مرتب کرنے کا حکم دیا ہے۔ انہوں نے بتایا کہ علی ظفر کو پیغام بھیجا ہے تاکہ جیل حکام کا اعتراض دور کیا جا سکے اور اس ہفتے میں ہی ملاقات کے لیے نام بھجوا دیے جائیں۔
ان کا کہنا تھا کہ بانی پی ٹی آئی سے ملاقات کے لیے علی ظفر نے دوسری فہرست جاری کر دی ہے، لہٰذا اڈیالہ جیل انتظامیہ کے پاس ملاقات کی اجازت نہ دینے کا اب کوئی جواز باقی نہیں رہتا۔
