بھارتی کرکٹ ٹیم کے سابق کپتان اور کانگریس رہنما محمد اظہرالدین نے مسلمان خاتون ڈاکٹر کا نقاب کھینچنے کے واقعے پر بھارتی ریاست بہار کے وزیراعلیٰ نتیش کمار کو شدید تنقید کا نشانہ بنایا ہے اور اس پر سخت کارروائی کا مطالبہ کیا ہے۔
بھارتی میڈیا سے گفتگو میں تلنگانہ کے وزیر برائے اقلیتی بہبود محمد اظہرالدین نے کہا کہ یہ نہایت قابلِ مذمت اور جاہلانہ حرکت ہے، جس کے لیے الفاظ نہیں ملتے۔
ان کا کہنا تھا کہ ایک وزیراعلیٰ کے منصب پر فائز شخص کو اس طرح کے رویے سے گریز کرنا چاہیے تھا اور انہیں اپنے عہدے کے وقار کا خیال رکھنا چاہیے تھا۔
محمد اظہرالدین نے مطالبہ کیا کہ اس معاملے میں بہار کے وزیراعلیٰ نتیش کمار کے خلاف سخت کارروائی کی جائے۔
واضح رہے کہ گزشتہ روز بہار کے دارالحکومت پٹنہ میں ایک تقریب کے دوران وزیراعلیٰ نتیش کمار نے ایک مسلمان خاتون ڈاکٹر کا نقاب کھینچ دیا تھا، جس پر شدید ردعمل سامنے آیا۔
اس واقعے کو بھارتی سیاسی رہنماؤں، صحافیوں اور انسانی حقوق کی تنظیموں نے شرمناک قرار دیا ہے جبکہ انسانی حقوق کی کارکن دپیکا پشکر ناتھ نے اسے جنسی ہراسانی کا سنگین واقعہ قرار دیا ہے۔
