پشاور:وزیراعلیٰ خیبر پختونخوا سہیل آفریدی نے لاہور سے واپسی پر وزیر اعلیٰ پنجاب مریم نواز کو خط لکھا ہے، جس میں پنجاب کے دورے کے دوران پروٹوکول کی مبینہ خلاف ورزیوں اور نامناسب سلوک پر شدید تحفظات کا اظہار کیا گیا ہے۔
خط میں سہیل آفریدی نے لکھا کہ دورہ پنجاب کے دوران ان کے ساتھ نامناسب رویہ اختیار کیا گیا اور بدتمیزی کی گئی جو کہ عوامی مینڈیٹ کی توہین کے مترادف ہے، انہوں نے دورے کے بعد منظم سوشل میڈیا مہم کی بھی سخت مذمت کرتے ہوئے کہا کہ ریاستی سرپرستی میں کردار کشی ناقابل قبول ہے۔
وزیراعلیٰ خیبر پختونخوا نے مزید کہا کہ پنجاب میں سیکیورٹی کے غیر ضروری اور حد سے زیادہ اقدامات کے باعث شہریوں کو شدید مشکلات کا سامنا کرنا پڑا، جو دورے کے دوران عوام اور وفد کے لیے مشکلات کا سبب بنے۔
خط کے ذریعے سہیل آفریدی نے واضح کیا کہ صوبائی دوروں میں پروٹوکول اور شہری سہولتوں کا خیال رکھا جانا لازمی ہے اور ان کے خلاف غیر مناسب رویے اور میڈیا پر منفی مہم ناقابل قبول ہیں۔
