لاہور : پنجاب حکومت کی جانب سے بسنت کے دوران 132 گانوں پر پابندی عائد کردی، جن میں ’نک دا کوکا‘ بھی شامل ہے۔
اطلاعات کے مطابق پنجاب حکومت نے تھیٹر اور سٹیج پرفارمنسز میں استعمال ہونے والے 132 پنجابی گانوں پر پابندی عائد کی ہے جنہیں غیراخلاقی، فحش اور ذومعنی مواد پر مبنی قرار دیا گیا۔
بسنت کے دنوں میں یہ پابندی ہر قسم کی اسٹیج اور تھیٹر پرفارمنسز پر لاگو ہوگی جن میں نجی یا کمرشل دونوں شامل ہیں، اس حوالے سے محکمہ اطلاعات و ثقافت کی جانب سے باضابطہ نوٹیفکیشن بھی جاری کردیا۔
نوٹیفکیشن میں کہا گیا ہے کہ ممنوع قرار دیے گئے گانوں کے بول، اشعار اور دھنیں ایس او پیز کی خلاف ورزی کرتے ہیں، یہ اقدام 13 اگست 2025ءکو جاری کردہ تھیٹر پرفارمنس پالیسی کی روشنی میں اٹھایا گیا ہے۔
پابندی تاحکمِ ثانی نافذ رہے گی اور اس کی خلاف ورزی کی صورت میں کسی قسم کی رعایت نہیں دی جائے گی۔
پنجاب بھر کے تمام ڈویژنل اور ضلعی آرٹس کونسلز کے ڈائریکٹرز، ڈپٹی ڈائریکٹرز اور نجی تھیٹرز کے مالکان و پروڈیوسرز کو سختی سے ہدایات دیں کہ ممنوع گانوں کی فہرست پر مکمل عملدرآمد کو یقینی بنایا جائے۔
یاد رہے کہ چند روز قبل شالامار باغ لاہور میں ایک تقریب کے دوران’ نک دا کوکا‘ گانے پر معروف قوال اور ان کے ساتھیوں کے خلاف بغاوت سمیت دیگر سنگین دفعات کے تحت مقدمہ درج کیا گیا۔
