فرانس میں 15 سال سے کم عمر بچوں کے لیے سوشل میڈیا کے استعمال پر پابندی سے متعلق بل ایوانِ زیریں سے منظور کر لیا گیا ہے۔ بل کی حتمی منظوری کے لیے اب اسے سینیٹ میں پیش کیا جائے گا۔ خبر رساں ایجنسی کے مطابق یہ اقدام آن لائن ہراسانی اور کم عمر بچوں کی ذہنی صحت کو لاحق بڑھتے ہوئے خطرات کے پیش نظر کیا گیا ہے۔
فرانس کی قومی اسمبلی میں پیش کیے گئے اس بل میں تجویز دی گئی ہے کہ 15 سال سے کم عمر بچوں کو سوشل میڈیا پلیٹ فارمز کے استعمال سے روکا جائے۔ اس کے ساتھ ساتھ مڈل اسکولوں میں اسمارٹ فونز کے استعمال پر عائد پابندی کو ہائی اسکولوں تک توسیع دینے کی سفارش بھی شامل ہے۔
بل میں مؤقف اختیار کیا گیا ہے کہ کم عمری میں سوشل میڈیا کا استعمال ذہنی دباؤ، اضطراب اور دیگر نفسیاتی مسائل میں اضافے کا باعث بن رہا ہے۔ فرانسیسی صدر ایمانوئل میکروں پہلے ہی نوجوانوں میں بڑھتے تشدد اور منفی رویوں کی ایک بڑی وجہ سوشل میڈیا کو قرار دے چکے ہیں اور وہ آسٹریلیا کی طرز پر فرانس میں بھی کم عمر بچوں کے لیے سوشل میڈیا پر پابندی کے حامی ہیں۔
