مسلم لیگ ن کے صدر محمد نواز شریف کی جانب سے ایران کے سپریم لیڈر آیت اللہ علی خامنہ ای کی شہادت پر ایرانی حکومت اور عوام سے دلی تعزیت اور ہمدردی کا اظہار کیا گیا ہے۔
سماجی رابطے کی ویب سائٹ پر جاری بیان میں نواز نے اس واقعے کو ایران کی تاریخ کا نہایت اہم اور افسوسناک لمحہ قرار دیا۔ ان کا کہنا تھا کہ اس نوعیت کے سانحات گہرے جذباتی، سیاسی اور قومی اثرات مرتب کرتے ہیں۔
نواز شریف نے کہا کہ وہ اس مشکل گھڑی میں ایرانی قوم کے ساتھ مکمل یکجہتی کا اظہار کرتے ہیں۔ انہوں نے خطے اور عالمی سطح پر امن و استحکام کی ضرورت پر زور دیتے ہوئے دعا کی کہ اللہ تعالیٰ ایرانی عوام کو اس ناقابلِ تلافی نقصان کو برداشت کرنے کا حوصلہ عطا فرمائے۔
