پاکستان نے آذربائیجان اور ترکیہ پر ہونے والے حملوں کی سخت الفاظ میں مذمت کی ہے۔
وزیراعظم شہباز شریف نے سماجی رابطے کی سائٹ ایکس پر کہا کہ پاکستان دونوں ممالک کی حکومتوں اور عوام کے ساتھ مکمل یکجہتی کا اظہار کرتا ہے۔ انہوں نے ترکی پر حالیہ حملے پر اپنی گہری تشویش ظاہر کرتے ہوئے کہا کہ اس مشکل وقت میں پاکستانی عوام کی طرف سے ہم اپنے بہادر ترک بھائیوں اور بہنوں کے ساتھ کھڑے ہیں۔
وزیراعظم نے کہا کہ ایسے حملے قابل مذمت ہیں اور اس طرح کے اقدامات سے مزید کشیدگی پیدا ہو سکتی ہے اور علاقائی امن و استحکام کو خطرہ لاحق ہو سکتا ہے۔ انہوں نے زور دیا کہ خطے میں امن قائم رکھنے کے لیے خود مختاری کے احترام اور بات چیت و سفارت کاری کے راستے اپنانا ضروری ہے۔
اسی طرح، وزیراعظم نے آذربائیجان پر ہونے والے حالیہ حملوں پر بھی اپنی شدید تشویش کا اظہار کیا اور کہا کہ پاکستان آذربائیجان کی قیادت اور عوام کے ساتھ مضبوطی سے کھڑا ہے۔ انہوں نے اس بات پر زور دیا کہ ایسے اقدامات سے خطے میں امن و استحکام کو نقصان پہنچنے کا خطرہ ہے، اور کشیدگی کم کرنے کے لیے بات چیت اور سفارت کاری کو ترجیح دی جائے۔
