دکی: بلوچستان کے ضلع دکی کے چمالنگ علاقے میں ایک کوئلہ کان میں زہریلی گیس (میتھین) بھرنے کے باعث دو نوجوان کان کن دم گھٹنے سے جاں بحق ہو گئے۔ یہ واقعہ نہ صرف دو خاندانوں کے لیے صدمے کا باعث بنا بلکہ صوبے بھر میں کانکنوں کی حفاظت کے حوالے سے سنگین سوالات بھی اٹھا دیے۔
پولیس ذرائع کے مطابق جاں بحق ہونے والے کان کنوں کی شناخت گل ولد جمعہ خان اور نانائی ولد عبدالرحیم کے طور پر کی گئی ہے۔ دونوں کا تعلق اقوام علیزئی برادری سے تھا اور وہ افغانستان سے روزی روٹی کی تلاش میں پاکستان آئے تھے۔ حادثے کے وقت کان میں کام جاری تھا کہ اچانک زہریلی گیس بھر گئی، جس کے نتیجے میں دونوں کان کن چند لمحوں میں بے ہوش ہو کر موقع پر ہی جاں بحق ہو گئے۔
دیگر کانکنوں نے فوری طور پر ریسکیو کی کوشش کی، گیس کی شدت کے باعث وہ کامیاب نہ ہو سکے۔ ریسکیو ٹیموں نے لاشوں کو کان سے نکالا اور پولیس نے قانونی کارروائی مکمل کر کے انہیں ورثاء کے حوالے کر دیا۔ ورثاء نے لاشوں کو تدفین کے لیے اپنے آبائی علاقے منتقل کرنے کا فیصلہ کیا ہے۔
واقعے نے کوئلہ کانوں میں حفاظتی انتظامات اور مزدوروں کے تحفظ کے معاملات پر دوبارہ توجہ مرکوز کر دی ہے اور مقامی حکام سے مطالبہ کیا جا رہا ہے کہ کانوں میں حفاظتی اقدامات کو یقینی بنایا جائے تاکہ ایسے المناک حادثات کو روکا جا سکے۔
