واشنگٹن: امریکی جریدے کی ایک رپورٹ کے مطابق صدر ٹرمپ بعض نیٹو ممالک کے خلاف سخت اقدامات پر غور کر رہے ہیں، جنہوں نے ایران کے ساتھ کشیدگی کے دوران امریکا کا ساتھ نہیں دیا۔
میڈیا رپورٹس میں کہا گیا ہے کہ ایسے ممالک سے امریکی فوجیوں کا انخلا زیر غور ہے جو ایران سے متعلق امریکی مؤقف کی حمایت نہیں کر رہے، جبکہ اس کے برعکس ان ممالک میں فوجی موجودگی بڑھانے کا منصوبہ بنایا جا رہا ہے جو اس تنازع میں امریکا کے ساتھ کھڑے ہیں۔
ذرائع کے حوالے سے رپورٹس کے مطابق ممکنہ منصوبے میں یورپ کے اہم ممالک، اسپین اور جرمنی میں امریکی فوجی اڈوں کی بندش بھی شامل ہو سکتی ہے، جس سے نیٹو اتحاد کے اندر نئی بحث جنم لے سکتی ہے اور باہمی اعتماد پر اثر پڑنے کا خدشہ ظاہر کیا جا رہا ہے۔
دریں اثنا صدر ٹرمپ نے ایک اور سخت اقدام کا عندیہ دیتے ہوئے اعلان کیا ہے کہ جو بھی ملک ایران کو فوجی سازوسامان فراہم کرے گا، اس کی امریکا کو برآمد کی جانے والی تمام اشیا پر فوری طور پر 50 فیصد ٹیرف عائد کر دیا جائے گا اور اس پالیسی میں کسی قسم کی رعایت نہیں دی جائے گی۔
یہ بیان ایسے وقت میں سامنے آیا ہے جب واشنگٹن اور تہران کے درمیان دو ہفتوں کی جنگ بندی پر اتفاق ہوا ہے، تاہم اس کے باوجود امریکا کی جانب سے دباؤ برقرار رکھنے کی حکمت عملی واضح دکھائی دے رہی ہے، جسے سفارتی اور معاشی محاذ پر سخت پیغام کے طور پر دیکھا جا رہا ہے۔
عرب میڈیا رپورٹس کے مطابق ماضی میں روس اور چین پر ایران کی فوجی صلاحیت میں اضافے کے الزامات عائد کیے جاتے رہے ہیں، جن میں میزائل اور دفاعی نظام کی فراہمی شامل ہے، تاہم دونوں ممالک ان الزامات کی تردید کرتے آئے ہیں، جس سے عالمی سطح پر بیانیے میں اختلاف برقرار ہے۔