موسم کی صورتحال کے حوالے سے پنجاب ڈیزاسٹر مینجمنٹ اتھارٹی (پی ڈی ایم اے) نے اہم الرٹ جاری کرتے ہوئے صوبے کے مختلف علاقوں میں بارشوں اور بعض مقامات پر ژالہ باری کے امکانات ظاہر کیے ہیں، جس کے بعد متعلقہ اداروں کو پیشگی اقدامات کی ہدایت بھی جاری کر دی گئی ہے۔
پنجاب ڈیزاسٹر مینجمنٹ اتھارٹی کے مطابق 16 سے 18 اپریل کے دوران پنجاب کے متعدد اضلاع میں بارشوں کا سلسلہ شروع ہونے کا امکان ہے، جس سے موسم میں نمایاں تبدیلی متوقع ہے۔
اس دوران راولپنڈی، مری، گلیات، اٹک، جہلم، چکوال، تلہ گنگ اور گوجرانوالہ سمیت شمالی و وسطی علاقوں میں بارش کی پیشگوئی کی گئی ہے۔
مزید بتایا گیا ہے کہ حافظ آباد، وزیر آباد، سرگودھا، میانوالی، شیخوپورہ، گجرات، خوشاب اور منڈی بہاؤالدین جیسے اضلاع بھی بارش کے اس سلسلے کی زد میں آ سکتے ہیں، جہاں کہیں کہیں ژالہ باری کا امکان بھی ظاہر کیا گیا ہے، جو فصلوں اور ٹریفک نظام پر اثر انداز ہو سکتا ہے۔
ادھر جنوبی اور وسطی پنجاب کے مختلف حصوں میں بھی موسم کی یہی صورتحال برقرار رہنے کا امکان ہے، جن میں لاہور، سیالکوٹ، نارووال، فیصل آباد، جھنگ، چنیوٹ، بھکر، لیہ، راجن پور، نورپور تھل اور ڈیرہ غازی خان کے گردونواح شامل ہیں، جہاں وقفے وقفے سے بارشیں متوقع ہیں۔
پی ڈی ایم اے نے متعلقہ ضلعی انتظامیہ کو الرٹ رہنے اور کسی بھی ممکنہ ہنگامی صورتحال سے نمٹنے کے لیے پیشگی انتظامات مکمل رکھنے کی ہدایت کی ہے تاکہ شہریوں کو کم سے کم مشکلات کا سامنا کرنا پڑے۔