امریکی ریاست کیلیفورنیا کے گورنر گیون نیوسم نے صدر ڈونلڈ ٹرمپ کی ایران سے متعلق پالیسیوں پر کڑی تنقید کرتے ہوئے جاری جنگ کو فوری طور پر ختم کرنے کا مطالبہ کیا ہے، جسے انہوں نے ’’بے مقصد اور نقصان دہ‘‘ قرار دیا۔
اپنے بیان میں گورنر کیلیفورنیا گورنر گیون نیوسم کا کہنا تھا کہ ملک میں بڑھتی ہوئی مہنگائی اور روزمرہ اشیاء کی قیمتوں میں غیر معمولی اضافہ موجودہ انتظامیہ کی پالیسیوں کا نتیجہ ہے۔
گیون نیوسم نے خاص طور پر ایندھن کی قیمتوں میں اضافے کو صدر ٹرمپ کے فیصلوں سے جوڑتے ہوئے کہا کہ ان اقدامات نے عوام پر معاشی دباؤ میں مزید اضافہ کر دیا ہے۔
انہوں نے زور دیا کہ ایران کے ساتھ جاری کشیدگی اور جنگی صورتحال نہ صرف امریکا کی داخلی معیشت کو متاثر کر رہی ہے بلکہ عالمی سطح پر بھی اس کے منفی اثرات مرتب ہو رہے ہیں، اس لیے اس تنازع کو طول دینے کے بجائے فوری طور پر اس کا خاتمہ کیا جانا چاہیے۔
دوسری جانب امریکی سینیٹ میں بھی اس معاملے پر آواز بلند کی جا رہی ہے۔ سینیٹر ٹیمی بالڈون، جنہوں نے صدر کے جنگی اختیارات کو محدود کرنے سے متعلق قرارداد پیش کی ہے، کا کہنا ہے کہ اس جنگ سے اب تک کوئی مثبت نتیجہ برآمد نہیں ہوا۔ اس تنازع نے نہ صرف مہنگائی میں اضافہ کیا بلکہ بے شمار خاندانوں کو اپنے پیاروں سے دوری اور عدم تحفظ جیسے مسائل کا سامنا بھی کرنا پڑا ہے۔
سیاسی مبصرین کے مطابق امریکا کے اندر اس جنگ کے خلاف آوازیں تیزی سے بڑھ رہی ہیں، اور مختلف حلقے حکومت پر دباؤ ڈال رہے ہیں کہ وہ پالیسی پر نظرثانی کرتے ہوئے سفارتی راستہ اختیار کرے۔