سانگھڑ: شہدادپور ریلوے اسٹیشن کے قریب پھاٹک پر مسافر ٹرین اور منی ٹرک کے درمیان حادثے میں ایک شخص جاں بحق ہوگیا۔
ریلوے حکام کے مطابق کراچی سے پنجاب جانے والی پاک بزنس ٹرین نے پھاٹک عبور کرتے ہوئے ایک منی ٹرک کو ٹکر مار دی، جس کے نتیجے میں ٹرک ڈرائیور موقع پر ہی جان کی بازی ہار گیا۔
حکام کا کہنا ہے کہ ٹرین پھاٹک سے گزر رہی تھی کہ اچانک منی ٹرک سامنے آگیا۔ ابتدائی اطلاعات کے مطابق بریک فیل ہونے کے باعث ٹرک پھاٹک کا دروازہ توڑتے ہوئے ٹرین کی زد میں آگیا۔
ریلوے حکام کے مطابق حادثے کے بعد مسافر ٹرین کو روک دیا گیا ہے جبکہ اپ ٹریک بھی عارضی طور پر بند کر دیا گیا ہے۔
