ریاض: سعودی عرب نے امریکا اور ایران کے درمیان جاری تناؤ کو ختم کرنے کے لیے پاکستان کی ثالثی کوششوں کو سراہتے ہوئے اسے خطے میں دیرپا امن کے لیے اہم پیش رفت قرار دیا ہے۔ حکام نے پاکستان کے مثبت سفارتی کردار کی تعریف کی ہے۔
خبر رساں اداروں کے مطابق سعودی وزیر خارجہ فیصل بن فرحان نے ایک بیان میں کہا کہ پاکستان جس طرح کشیدگی کم کرنے کے لیے کوشاں ہے، وہ قابل ستائش ہے۔ انہوں نے مزید کہا کہ اس اقدام سے خطے میں جاری معاشی دباؤ میں نمایاں کمی لانے میں مدد ملے گی۔
انہوں نے واضح کیا کہ صدر ٹرمپ کی جانب سے خلیجی ممالک کی درخواست پر عین وقت پر فوجی کارروائی روکنا اور ایران کو مذاکرات کا موقع دینا ایک دانشمندانہ فیصلہ تھا۔ اب گیند ایران کی کورٹ میں ہے کہ وہ اس موقع کا فائدہ اٹھائے۔
فیصل بن فرحان نے ایران پر زور دیا کہ وہ پاکستان کی ثالثی کی کوششوں اور امریکی صدر کی دی گئی مہلت کو غنیمت جانیں۔ انہوں نے کہا کہ فریقین کو جلد کسی باہمی تصفیے پر متفق ہونا چاہیے تاکہ خطے میں جنگ کا خطرہ مستقل طور پر ٹل جائے۔
سعودی وزیر خارجہ کے مطابق خطے کا استحکام تبھی ممکن ہے جب ایران اور امریکا تلخیوں کو پس پشت ڈال کر سفارتی راستے کا انتخاب کریں۔ انہوں نے امید ظاہر کی کہ جاری سفارتی کوششیں جلد ہی ایک حتمی اور پائیدار امن معاہدے کی صورت میں سامنے آئیں گی۔
دوسری جانب مشرق وسطیٰ کے موجودہ حالات کے تناظر میں پاکستان کی مداخلت کو عالمی برادری میں بھی قدر کی نگاہ سے دیکھا جا رہا ہے۔
مبصرین کے مطابق پاکستان نے ہمیشہ خطے میں قیام امن کے لیے غیر جانبدارانہ کردار ادا کیا ہے اور یہی وجہ ہے کہ سعودی عرب بھی اس کی بھرپور حمایت کر رہا ہے۔
واضح رہے کہ مشرقِ وسطیٰ میں امن کا قیام عالمی معیشت اور خطے کے ممالک کے لیے ناگزیر ہے۔ پاکستان کی جانب سے کی جانے والی یہ سفارتی کوششیں خطے میں جاری بے چینی کو ختم کرنے کے لیے ایک ٹھوس اور سنجیدہ پیش رفت کے طور پر نتیجہ خیز ثابت ہو رہی ہیں۔