سرینگر/پریس انفارمیشن بیورو (پی آئی بی)، سرینگر ریجن، اپنے جاری میڈیا آؤٹ ریچ (رابطہ کاری) اقدامات کے سلسلے میں سرینگر کے صحافیوں کے لیے 13 سے 19 ستمبر 2026 تک چنئی کے ایک میڈیا دورے کا اہتمام کر رہا ہے۔
اس دورے میں سرینگر کے صحافیوں اور پی آئی بی کے عہدیداروں پر مشتمل 13 رکنی وفد شرکت کرے گا۔ روانگی سے قبل، پی آئی بی سرینگر کے ڈائریکٹر قاضی سلمان نے وفد کو دورے کے مقاصد کے بارے میں بریفنگ دی اور شرکاء پر زور دیا کہ وہ دورے کے دوران ہونے والی بات چیت اور ملاقاتوں سے بھرپور اور بامقصد استفادہ کریں۔
وفد کی قیادت سی بی سی (CBC) اننت ناگ کے فیلڈ پبلسٹی آفیسر شری شاہد لون کر رہے ہیں جو بطور ‘کنڈکٹنگ آفیسر’ (نگرانِ دورہ) خدمات انجام دے رہے ہیں، جبکہ پی آئی بی سری نگر کے انفارمیشن اسسٹنٹ شری افہام الاسلام بھی وفد کے ہمراہ ہیں۔
اس دورے کا مقصد صحافیوں کو چنئی میں مرکزی حکومت کے اہم اداروں، منصوبوں اور اقدامات کا براہِ راست مشاہدہ کرانا اور قومی سطح کی پالیسیوں اور زمینی سطح پر ان کے نفاذ کے بارے میں ان کی سمجھ بوجھ کو بڑھانا ہے۔
دورے کے دوران، وفد چنئی میں مرکزی حکومت کے مختلف اداروں اور منصوبوں کا دورہ کرے گا اور ان کے کام کرنے کے طریقہ کار اور سرگرمیوں کو سمجھنے کے لیے اعلیٰ عہدیداروں سے بات چیت کرے گا۔
وفد سے خطاب کرتے ہوئے قاضی سلمان نے شرکاء کو مبارکباد دی اور اس یقین کا اظہار کیا کہ یہ دورہ پیشہ ورانہ روابط استوار کرنے اور مرکزی حکومت کے اداروں کے کام کاج کو بہتر طور پر سمجھنے کا موقع فراہم کرے گا۔
