شہری سندھ کے عوام باشعور ہیں اور حالات کو سمجھ رہے ہیں سیاسی ماحول ختم کیا جارہا ہے
سندھ میں جمہوریت نہیں لگتا ہے بادشاہت ہے‘ جنرل ورکرز اجلاس سے رہنمائوں کا خطاب
کراچی(اسٹاف رپورٹر)متحدہ قومی موومنٹ پاکستان نارتھ کراچی ٹاؤن کے زیر اہتما م جنرل ورکرز اجلاس سے خطاب کرتے ہوئے رکن رابطہ کمیٹی فیصل سبزواری نے کہا ہے کہ ملک کی مجموعی سیاسی صورتحال میں اتار چڑھائو کا سلسلہ بہت تیزی سے چل رہا ہے متحدہ قومی موومنٹ پاکستان اور شہری سندھ کے عوام با شعور ہیں اور حالات کو سمجھ رہے ہیں ۔یہ بات گزشتہ روز نارتھ کراچی ٹاؤن میں فیصل سبزواری نے جنرل ورکرز اجلاس سے خطاب کرتے ہوئے کہی اس اجلاس میں انچارج سی او سی فرقان اطیب،ارکین سی او سی،حق پرست رکن قومی اسمبلی اسامہ قادری،حق پرست رکن سندھ اسمبلی وسیم قریشی،ٹاؤن انچارجز و ارکین کمیٹی،یوسی انچارجز و ارکین کمیٹی،شعبہ خواتین،ایلڈرز ونگ،لیبر ڈویژن کے مرکزی زمہ داران اور کارکنان نے بڑی تعداد میں شرکت کی۔فیصل سبزواری نے کہا کہ سندھ میں پچھلے 12 برسوں سے سیاست نہیں ذاتی مفادات کا خیال رکھا جا رہا ہے اور یہاں سیاسی ماحول کو اسطرح ختم کیا جا رہا ہے جیسے سندھ میں جمہوریت نہیں بلکہ با دشاہت ہے ۔انہوں نے کہا کہ پورے سندھ میں بلدیاتی اداروں کو ناکام کرنے کے لئے اختیارات کو چھینا گیا اور جب اختیارات اور مسائل الگ الگ ہوجائیں تو پھر لاڑکانہ اجڑے یا کراچی نا اہل سندھ حکومت خد کو اس سے لاتعلق رکھتی ہے ۔
