کراچی: وفاقی وزیر برائے سائنس اینڈ ٹیکنالوجی فواد چودھری کا کہنا ہے کہ پی ٹی آئی پسند نہیں تو پھر بھی انہیں 5 سال برداشت کرنا پڑے گا جب کہ عمران خان کا کوئی متبادل نہیں تو اسی پر گزارا کریں۔
نجی ٹی وی کے مطابق کراچی میں ایک تقریب سے خطاب کرتے ہوئے وفاقی وزیر برائے سائنس اینڈ ٹیکنالوجی فواد چودھری کا کہنا تھا کہ مولانا فضل الرحمان نے احتجاج کرکے اپنا حق استعمال کیا، انہوں نے اپنی سیاسی قوت کا اظہار کیا ہے جب کہ بعض میڈیا والے مدعی سست گواہ چست والا معاملہ کر رہے ہیں۔ ان کا کہنا تھا کہ نوازشریف کی صحت خراب ہے، اللہ انہیں صحت دے، ان کے خاندان والوں کو چاہیے قوم کے پیسے واپس کر دیں جب کہ نوازشریف کے لیے دعاگو ہیں۔
فواد چودھری نے کہا کہ پی ٹی آئی پسند نہیں تو پھر بھی انہیں 5 سال برداشت کرنا پڑے گا، عمران خان کا کوئی متبادل نہیں تو اسی پر گزارا کریں، اپوزیشن کا ویسے ہی کوئی حال نہیں، کوئی بیمار ہے، کوئی اسپتال میں پڑا ہے۔ انہوں نے کہا کہ ہماری تحریک سیاسی تھی تاہم مولانا فضل الرحمان کو اپنے مقاصد کا ہی نہیں پتا، پی ٹی آئی کے دھرنے کو اس دھرنے سے نہیں جوڑنا چاہیے، مسئلہ کشمیر دھرنے کی وجہ سے پیچھے چلا گیا۔
