راولپنڈی: پاکستان کرکٹ بورڈ کے چیئرمین احسان مانی نے کہا ہے کہ ملک میں کرکٹ بحالی کیلئے انگلینڈ اور آسٹریلیا کی ٹیمیں پاکستان آئیں گی۔
چیئرمین پاکستان کرکٹ بورڈ احسان مانی نے راولپنڈی کرکٹ اسٹیڈیم کا دورہ کیا اور انتظامات کا جائزہ لیا۔اس موقع پر میڈیا سے گفتگو کرتے ہوئے انہوں نے کہا کہ انگلینڈ اور آسٹریلیا کی ٹیمیں 2021 اور 2022 میں پاکستان کا دورہ کریں گی جبکہ اگلے ماہ ایم سی سی بھی آرہی ہے۔
احسان مانی نے مزید کہا کہ بنگلہ دیش کرکٹ بورڈ سے بات چل رہی ہے،پاکستان محفوظ ملک ہے اگر کسی کو اعتراض ہے تو وہ آگاہ کرے۔
چئیرمین پی سی بی نے بھارتی کرکٹ بورڈ پر تنقید کرتے ہوئے کہا کہ وہاں انتہاء پسند لوگ براجمان ہیں اور اب بھارت کے ساتھ برابری کی بنیاد پر بات ہوگی۔ ایک سوال کے جواب میں انہوں نے کہا کہ وزیراعظم عمران خان کا کام ملک کو چلانا ہے وہ کسی ٹیم کو کیوں دعوت دیں۔
چیئرمین پی سی بی نے دورہ آسٹریلای میں قومی ٹیم کی ناقص پرفارمنس پر کہا کہ ہماری خامیاں کھل کر سامنے آگئیں ہیں ، ہمیں کرکٹ کو بین الاقوامی معیارپر لانا ہوگا، باؤلنگ لیب میں ہمارے بالرز کی تربیت ہوتی ہے۔
