پیرس (انٹرنیشنل ڈیسک) فرانس میں صدر عمانویل ماکروں کی جانب سے پنشن اصلاحات کے خلاف شروع ہونے والے احتجاج کو 12روز مکمل ہوگئے۔ دوسری جانب فرانسیسی حکومت ہڑتال کے باوجود اپنے اصلاحاتی پروگرام کو نافذ کرنا چاہتی ہے۔ ہڑتال کی وجہ سے پیرس اور گرد و نواح کے علاقوں میں سڑکوں پر ٹریفک جام رہنا معمول بن چکا ہے۔ پیرس میں صرف خود کار میٹرو سروس ہی بحال ہے،جب کہ ڈرائیوروں سے چلنے والی میٹرو سروس معطل ہے۔ اسی طرح ریل گاڑیوں کا اندرونی اور بیرونی نظام بھی ہڑتال کی وجہ سے غیر فعال ہے۔ ٹرک ڈرائیوروں نے بھی تنخواہوں میں اضافے اور روزگار کی بہتر شرائط کے لیے پیر کے روز ہڑتال میں ساتھ دیا۔
