لاہور(نمائندہ جسارت) لاہور ہائیکورٹ نے کالعدم جماعت الدعوۃ کے امیر حافظ سعید اوران کے ساتھیوں پردہشت گردی کا مقدمہ ملتان سے لاہور منتقل کردیا،ساہیوال میں درج 2مقدمات لاہور منتقل کرنے کی درخواست پر سی ٹی ڈی سے جواب طلب کرلیا۔چیف جسٹس لاہور ہائی کورٹ مامون رشید شیخ نے کیس کی سماعت کی۔حافظ سعید اور ساتھیوں کی جانب سے درخواستیں دائر کی گئی
تھیں۔وکلا نے کہا کہ حافظ سعید اور ان کے ساتھیوں کے خلاف دہشت گردی کے 2مقدمات ساہیوال اور ایک مقدمہ ملتان عدالت میں زیرسماعت ہے، اسی نوعیت کے مقدمات لاہور کی عدالت میں بھی زیر التوا ہیں۔استدعا ہے کہ مقدمات کو لاہور منتقل کر کے یکجا کرنے کا حکم دیا جائے۔ ایڈیشنل پراسیکیوٹر جنرل عبدالصمد نے کہا کہ مقدمات لاہور منتقل کرنے پر کوئی اعتراض نہیں۔ عدالت نے ملتان کے مقدمے کو لاہور منتقل کرنے کا حکم دے دیا اور ساہیوال میں درج 2مقدمات لاہور منتقل کرنے کی درخواست پر سی ٹی ڈی سے جواب طلب کرلیا۔
