اسلام آباد(صباح نیوز)سابق چیئرمین سینیٹ اور پیپلز پارٹی کے سینئر رہنما رضا ربانی نے کہا ہے کہ پیٹرولیم مصنوعات کی قیمتوں میں اضافہ آئی ایم ایف کی مشاورت سے کیا گیا ہے، پیٹرول مافیا نے سول بیورو کریسی کے ساتھ مل کر تیل کی مصنوعی قلت پیدا کی، یکم جولائی سے قبل قیمتوں میں
ریکارڈ اضافہ اوگرا کے بجائے وزارت خزانہ نے آئی ایم ایف کی مشاورت سے کیا، تیل کی قیمت بھی بین الاقوامی مالیاتی سامراج آئی ایم ایف کنٹرول کر رہا ہے۔رضا ربانی نے کہا کہ تیل کمپنیوں کے مافیا کے دبائوسے حکومت کو جھک جانے پر مجبور کیا، مافیا نے سول بیوروکریسی کے ساتھ مل کر تیل کی مصنوعی قلت پیدا کی۔پی پی کے سینئر رہنما نے کہا کہ آج بھی تیل کمپنیوں کے پاس ان کے لائسنس کے مطابق تیل کے ذخائر موجود نہیں۔ان کا کہنا تھا کہ حکومت اس گٹھ جوڑ کو روکنے اور قانون کا نفاذ کرنے میں ناکام رہی ہے۔
