بغداد (انٹرنیشنل ڈیسک) عراق میں نامعلوم افراد کے ہاتھوں سماجی کارکنوں کے قتل کے تازہ واقعات میں 5 سرکردہ شخصیات کو قتل کر دیا گیا ہے۔ عرب ٹی وی کے مطابق مقتولین میں بصرہ سے تعلق رکھنے والی خوراک کے شعبے کی ایک ڈاکٹر اور سرکردہ سماجی کارکن رہام یعقوب بھی شامل ہیں، جنہیں جمعرات کے روز نامعلوم مسلح افراد نے گاڑی پر فائرنگ کر کے قتل کردیا۔ سیکورٹی اور طبی ذرائع کے مطابق بدھ کے روز بھی ایک عراقی کارکن ہلاک اور 3 زخمی ہو گئے تھے۔
