افغان رکن پارلیمنٹ کی گاڑی بارودی مواد سے ٹکرا گئی، 2 جاں بحق

کابل (اے پی پی+ مانیٹرنگ ڈیسک) افغانستان کے دارالحکومت کابل میں قومی پارلیمنٹ کے رکن محمد توفیق وحدت کی گاڑی بارودی مواد سے ٹکراگئی، دھماکے کے نتیجے میں 2 افراد ہلاک اور 2 شدید زخمی ہوگئے، زخمی ہونے والوں میں رکن پارلیمنٹ کا بھائی بھی شامل ہے۔ علاوہ ازیں کابل کے علاقے کاتہ نو میں نامعلوم افراد کی فائرنگ سے جج ہلاک ہوگیا۔ چینی خبر رساں ادارے نے کابل پولیس کے ترجمان فردوس فرامارازکے حوالے سے بتایا ہے کہ دھماکے کے باعث ایم پی محمد توفیق وحدت کی گاڑی کو آگ لگ گئی تھی، آخری اطلاعات ملنے تک کسی گروپ نے اس دھماکے کی ذمے داری قبول نہیں کی تھی۔