نئی دہلی ؍ ماسکو (انٹرنیشنل ڈیسک) بھارت اور چین کے درمیان حالات میں کشیدگی بڑھنے کے بعد مودی سرکار کی ناکام پالیسیوں کی وجہ سے روس نے بھی نئی دہلی سے فاصلے اختیار کرنا شروع کردیے ہیں۔ دونوں ملکوں کے درمیان 20 برس سے باقاعدگی کے ساتھ منعقد ہونے والا اجلاس پہلی بار منسوخ کردیا گیا ہے۔ بھارتی حزب اختلاف کی جماعت کانگریس نے حکومت پر تنقید کرتے ہوئے کہا ہے کہ روس کے ساتھ روابط خراب ہونے سے بھارت کو مستقبل میں بڑی مشکلات کا سامنا کرنا پڑ سکتا ہے۔ واضح رہے کہ روس نے حال ہی میں بحرہند اور بحرالکاہل کے حوالے سے بھارتی اقدامات اور کواڈ گروپ میں اس کی شمولیت پر تحفظات کا اظہار کیا تھا۔
